Dylunio rhif cofrestru sy’n gweithio ar draws y sector

Post gan Gareth, Arweinydd Cofrestru, Awdurdod Cyllid Cymru

O dymor yr hydref 2026 ymlaen, bydd angen i ddarparwyr llety ymwelwyr yng Nghymru gofrestru gydag Awdurdod Cyllid Cymru (ACC). Pan fydd darparwr yn cofrestru, byddan nhw’n cael rhif 8 digid unigryw . Mae’r gwaith o ddylunio’r rhif hwnnw wedi bod yn fwy dyrys nag y byddai rhywun wedi ei ddisgwyl.

Read this page in English

Pwysigrwydd y rhif cofrestru

Bydd y rhif cofrestru yn cael ei roi yn syth pan fyddwch yn cyflwyno’ch cofrestriad. Mae’n rhoi cadarnhad ar unwaith eich bod wedi gorffen y broses. Gall darparwyr llety ddangos y rhif cofrestru ar eu gwefan a’u llwyfannau archebu er mwyn dangos eu bod wedi’u cofrestru. Bydd ymwelwyr hefyd yn gallu gwirio bod llety wedi’i gofrestru trwy edrych ar gofrestr gyhoeddus o lety ymwelwyr.

Caiff y rhif hwn ei ddefnyddio ar draws y sector – gan gynnwys gan asiantaethau teithio ar-lein (OTA) fel Booking.com ac Airbnb – felly mae angen iddo fod yn unigryw, rhaid gallu ymddiried ynddo, a rhaid iddo fod yn hawdd i’w wirio.

Gweithio ar draws y llywodraeth a’r sector

Er mwyn gwneud hyn yn iawn, rydym wedi bod yn gweithio gydag adrannau a sefydliadau eraill y llywodraeth er mwyn dod i ddeall sut mae rhifau cofrestru a thrwyddedu yn cael eu defnyddio ar hyn o bryd, ac i ddysgu beth allai achosi dryswch.

Buom yn siarad â:

• yr Adran dros Ddiwylliant, y Cyfryngau a Chwaraeon (DCMS), yn enwedig am y cynllun cofrestru newydd ar gyfer eiddo yn Lloegr
• Croeso Cymru
• Rhentu Doeth Cymru

Buom hefyd yn gwneud ein gwaith ymchwil ein hunain ar y rhifau cofrestru a’r cyfeirnodau eraill sy’n cael eu defnyddio mewn mannau eraill. Buom yn edrych ar eu fformatau, ble maen nhw’n cael eu harddangos, sut mae defnyddwyr yn eu defnyddio, a pham eu bod wedi’u cynllunio fel hyn. Fe wnaethom hefyd gynnal gweithdy mewnol gyda chydweithwyr o’r adrannau polisi, cyflawni, dylunio a gweithrediadol er mwyn profi syniadau a chymharu dulliau.

Rhan allweddol o’r gwaith hwn oedd nodi ble allai defnyddwyr ddrysu rhwng un cynllun ag un arall, yn enwedig mewn achosion pan fo cynulleidfaoedd tebyg yn ymateb i nifer o ofynion ar draws gwahanol wasanaethau.

Ystyried deddfwriaeth a newid yn y dyfodol

Roedd hefyd angen i ni ystyried Bil Datblygu Twristiaeth a Rheoleiddio Llety Ymwelwyr (Cymru), sy’n mynd trwy’r Senedd ar hyn o bryd. Mae’r bil hwn yn cyflwyno cynllun trwyddedu ar gyfer llety ymwelwyr yng Nghymru. Er bod cofrestru a thrwyddedu’n wahanol, mae defnyddwyr yn gweld cysylltiadau agos rhyngddyn nhw. Rhaid sicrhau bod gwahaniaethau amlwg rhwng y rhifau sy’n gysylltiedig â’r ddau beth, nawr ac yn y dyfodol.

Mae dylunio rhywbeth sy’n gweithio heddiw ac na fydd yn achosi problemau wrth i ddeddfwriaeth newid wedi bod yn rhan fawr ganolog o’n meddwl.

Sicrhau ei fod yn gweithio’n fewnol

Nid mater sydd ond yn effeithio ar ddefnyddwyr allanol yw hwn. O fewn ACC, rydym eisoes yn defnyddio rhifau 12 digid unigryw ar gyfer gwasanaethau presennol, sef rhif cyfeirnod unigryw trafodiadau (CUT). Roedd cyflwyno rhif newydd yn golygu bod angen i sicrhau na fyddai’n gwrthdaro â fformatau presennol. Pan fydd rhywun yn cysylltu â ni, rhaid i staff ein desg gymorth allu gweld ar unwaith i ba wasanaeth mae rhif yn perthyn.

Y canlyniad hyd yma

Rydym wedi cytuno ar rif cofrestru 8 digid newydd. Mae’r rhif hwn yn llwyddo i gydbwyso’r canlynol:

• gwahaniaeth amlwg rhyngddo a chynlluniau eraill
• digon syml i ddefnyddwyr ei ddeall a’i rannu
• hawdd i dimau mewnol a phartneriaid allanol ei adnabod a’i ddilysu

Bydd y rhif yn cael ei gynhyrchu a’i gyhoeddi ar unwaith pan fydd darparwyr llety yn cyflwyno eu cofrestriad, gan roi prawf i chi’n syth eu bod wedi cwblhau’r broses.

Beth nesaf

Dros yr wythnosau nesaf, byddwn yn ymgorffori’r rhif cofrestru hwn yn y gwasanaeth. Pan fyddwn wedi mynd yn fyw, byddwn yn dechrau gweithio gydag Asiantaethau Teithio Ar-lein i gefnogi gwiriadau dilysu o fewn eu systemau.

Yn debyg i sawl agwedd arall ar y gwasanaeth hwn, mae hon yn broses ailadroddol. Byddwn yn parhau i brofi, i ddysgu ac i fireinio.

Cyfle i chi ddweud eich dweud

Byddem wrth ein bodd yn clywed eich barn. Os hoffech chi gynnig adborth neu gymryd rhan mewn gwaith ymchwil, cysylltwch â ni trwy anfon neges i cofrestrucenedlaethol@acc.llyw.cymru.

Cofrestrwch i gael diweddariadau ac i gael gwybod pan fydd cofrestru’n agor. 

Sylwer: Mae popeth rydym yn ei rannu yn waith sydd ar ei ganol a gall newid wrth i ni barhau i ddatblygu’r gwasanaeth ar sail eich adborth chi a’r hyn rydym yn ei ddysgu trwy brofi.